يفرن عروس الكاف يازايرها
يسرّك هواها ويعجبك منظرها
يفرن بلاد فلاحة
بلاد التين والزيتون والتفاحة
وفيها مناظر يعجبوا السّواحة
جبال شامخة مضّبطات شجرها
تقول امّ ضمّت ولدها مرتاحة
بكل عطفها وحنانها ونظرها
جبال عالية وحنونة
ترضّع شجرها في الجذب وتصونة
من كل حرّ وريح عاصف عونة
مهما عليها هب ماحيرها
وتشهد بهذا شجرة الزيتونة
ثلاثين قرن ؤكامشة موكرها
يفرن مليح هواها
دوم جافّ ديمة في صيفها وشتاها
خسر كان من لازارها لا راها
ولاعرف منها ناس ولا عاشرها
ولادار في وديانها بنباه
ولاجال جولة صيف في ظاهرها
ليا زارها بالنـيّة
وبقلب واعي من شعوره حيّا
وبات كودجات وقيّلْ الرومية
وشرب من اميتهم إجيب اخبرها
وهيّف على القطار ضيف عشية
يشوف الطبيعة وعزّ من صوّرها
هيّف على الشرشارة
سواء فصبح ولا في عقاب نهاره
يلقى الجبل يسكب دموع غزارة
من كل حنية دمعته قطرها
تقول كان فاقد حد من زوّاره
ولافرح لين دمعته حدّرها
يفرن هواها هايل
وسكانها من ليبيا الاوائل
على وطنهم لاحد فيهم حايل
فعركة الهاني كان تتصورها
هافوا شباب وشيب فوق ضوايل
نار شاعلة بيطفوا لهيب شررها
مع خوتهم زي الغدير السايل
ضربوا العدو ضربات يتفكرها
سكانها يتباته
نفوسة وبعض صناهجة وزناتة
اللي شيدوا في ما مضى صبراتة
منها مشوا بعد الزمان غدرها
عليهم هجم الروم بقواته
وجملة شمال افريقيا كسّرها
قديم عهدها يفرنا من قبل رومة وقبل قرطاجنة
منين في جبل تيريت سكنو هلنا وفي تامديت وغارها وصبرها
| 
